喺上世紀60年代，廣州沙河大飯店有一個大廚師，對粵菜嘅烹調廚藝都幾有心思，平日休息時間就鍾意去收集啲民間菜式。
那日，大廚嚟到白雲山腳濂泉邊一個斬柴人嘅屋企。斬柴人拿出一碟酸甜豬手招呼大廚。豬手白白淨淨，好似冇用醬料烹調過噉，賣相就麻麻地。試食之後，大廚卻大讚好野：酸中帶甜、肥而不膩、皮爽肉滑，另有一番風味！大廚虛心請教斬柴人，侇個豬手嘅做法同出自邊度？
原嚟，白雲山能仁寺有一個當廚僧嘅小和尚六根未淨，買菜時多買咗隻豬手帶返來膳房，偷偷噉煮嚟食。點知豬手仲未煮熟，就聽到師傅喺膳房外嘅聲音，嚇得慌忙將瓦掌成煲掉咗落膳房後門嘅山溪那度。
下晝嘅時候，斬柴人擔住山柴落山，經過山溪諗起早上喺山上睇到小和尚掉咗啲野喺山溪，就好奇噉去睇下，見到山泉水裡面有一隻半生不熟嘅豬手，就將佢帶咗返屋企。斬柴人要趕住去賣柴，又怕天口熱豬手變味，就將豬手放咗落醃酸甜蘿白嘅白醋裡面，賣完柴返嚟撈起隻豬手重新煮熟嚟食，覺得都幾好食。以後，斬柴人就用呢個做法，時不時買隻豬手來犒勞自己嘍。
哦，原嚟酸甜豬手嘅做法關鍵係浸泡山泉水！大廚得到經驗，將浸山泉嘅時間同烹調做法做咗一啲改進，就將呢味菜喺飯店推出餐檯，取名「白雲豬手」。從此就流傳開嚟，成咗名菜添！